Í ágúst var skráð atvinnuleysi hjá Vinnumálastofnun 7,3% samanborðið við 7,5% í mánuðinum á undan og 7,7% á sama tíma fyrir ári. Atvinnuleysi er þó líklega jafn mikið eða heldur meira en fyrir ári. Þetta stafar af því að gerðar hafa verið breytingar á atvinnuleysisbótarétti svo og á aðferð við útreikning sem þýða að atvinnuleysið mælist minna en ella í ár. Atvinnuleysi meðal karla er 7,3% en meðal kvenna 7,4%. Atvinnuleysi er talsvert meira á höfuðborgarsvæðinu (8,3%) en á landsbyggðinni (5,5%), mest er það þó á Suðurnesjum (11%).

Yfirleitt er atvinnuástandið best á sumrin og fram eftir hausti en verst yfir háveturinn og frameftir vori. Miðað við þetta má ætla að skráð atvinnuleysi minnki örlítið næstu 1-2 mánuði. Á hinn bóginn þarf að taka með í reikninginn að lausum störfum hjá vinnumiðlunum hefur ekki fjölgað mikið upp á síðkastið, reyndar fækkar þeim í ágúst bæði milli mánaða og ára. Þá er ljóst að seinkun hefur orðið á afgreiðslu ýmissa mikilvægra mála er snerta starfsumhverfi fyrirtækja með þeim afleiðingum að fjölgun nýrra starfa hefur verið hægari en búist var við.

sjá nánar (pdf)